مکہ مکرمہ کے حرا کلچرل ڈسٹرکٹ میں واقع قرآن میوزیم میں دنیا میں اپنی نوعیت کے سب سے بڑے قرآن کریم کے نسخے کو گنیز بک آف ورلڈ ریکارڈ میں درج کر لیا گیا ہے-
یہ قرآن کریم 700 صفحات پر مشتمل ہے جس کا حجم (312 × 220) سینٹی میٹر ہے- قرآن کے اس نسخے کو دسویں صدی ہجری کے قرآن کریم کے ایک بڑے نسخے کی طرح بنایا گیا ہے جس کا اصل حجم (45 × 30) سینٹی میٹر ہے۔
سورتوں کو خطِ ثلث جبکہ سورۃ الفاتحہ کو خطِ النسخ میں لکھا گیا ہے۔ قرآن کریم کا یہ نسخہ عربی فنِ خطاطی، گلڈنگ اور بائنڈنگ کی ایک منفرد مثال ہے جس میں اسلامی طرز کی خصوصیات اور سجاوٹ نمایاں ہے۔
قرآن میوزیم میں آنے والے زائرین کو مختلف ادوار میں موجود قرآنی نسخوں کے بارے میں مکمل معلومات فراہم کی جاتی ہیں۔ میوزیم میں قرآن کریم کی طباعت کے بارے میں تصاویر اور دستاویزی فلموں کے ذریعے مکمل معلومات فراہم کیے جانے کا بھی انتظام ہے۔
قرآنِ کریم کے سب سے بڑے نسخے کا گنیز بک آف ورلڈ ریکارڈ میں اندراج
